Revista Pa Fokus

Revista Pa Fokus në bashkëpunim me nismën Multilanguage Caffee lançon nismën më të re që quhet “Fol Shpejt”. Qëllimi i këtij aktiviteti do të jetë prezantimi i grupeve të ndryshme që operojnë në Shqipëri dhe projekteve të tyre; por vetëm me një kusht të caktuar – ata pavarësisht rëndësisë së projektit të tyre do të duhet të lënë mënjanë shpjegimet e tepërta (teorira, tha ky ketë, tha ai këtë, takova këtë, takova atë), dhe të synojnë reflektimin e punëve të tyre në një kohë nga 10 minuta në 25 minuta. Kjo ka për qëllim t’i shtyjë këto grupe për të menduar prezantime alternative, dhe ç’është më e rëndësishmja, të mos mërzisin audiencën. Kjo bëhet me qëllim sfidimin e ambienteve akademike që përmes protestave të kërkimit të të drejtave, nuk do të ndryshojnë asnjëherë metodologji. Për këtë arsye ne erdhëm me këtë ide e cila presim t’i bëjë këto institucione të reflektojnë. Prezantimet janë në shërbim të dijes, për dijen, dhe kundrejt dijes – prandaj e rëndësishme është të jeni të përgatitur për një ambient krejt ndryshe nga ai universitar, gjimnazist apo gjetkë, dhe të jeni të mprehur deri më dhëmbë me armën tuaj më të fortë, dëshirën për të përcjellë punën tuaj sa më mirë.